Бугун Суперлига 15-тури доирасида икки ўйин бўлиб ўтади. Жиззах ва Термиздаги беллашувлар асло зериктирмайди деган умиддамиз.
20:00. “Сўғдиёна” – “Қўқон-1912”
Иккала жамоа биринчи даврани кутилганидек ўтказа олмаяптилар. Улар турнир жадвалида мос равишда 13 ва 14-ўринда боришмоқда. Айниқса, қўқонликлар кетма-кет мағлубиятлар сериясига тушиб қолган. Бу эса футболчиларга руҳий жиҳатдан ҳам таъсир ўтказиши табиий.
“Сўғдиёна” бугуннинг ўзидаёқ учта янги харидларни амалга оширди. Жалолиддинов, Раҳмонов ва Ҳебай эндиликда жиззахликлар сафида тўп суради. Хуллас, қизиқарли ўйин бўлади. Ҳар ҳолда иккала жамоага ҳам очко сув ва ҳаводек зарур.
Ўйин олдидан мезбонларда устунлик бор. Аммо Баҳром Ҳайдаров жамоаси ҳам очко олиш учун охиригача курашишига шубҳа йўқ.
20:00. “Сурхон” – “Бухоро”
Ҳар иккала жамоада ҳам кайфият жуда яхши. Февзи Давлетов жамоаси ўтган турда Олмалиқда ОКМКга деярли имкон қолдирмади ва 0:1 ҳисобида ғалаба қозониб муҳим уч очкони қўлга киритди.
“Бухоро” ҳам узоқ кутилган ғалабага эришди. Термиздан ҳам 3 очко олиб қайтишга бел боғлаган. Аммо “Сурхон” яхши ўйин кўрсатадиган бўлса, Улуғбек Бақоев ва унинг жамоасига осон кечмаслиги табиий.
Бу ўйинда кичик устунлик мезбонлар томонида бўлиши мумкин. Аммо қолганини вақт кўрсатади.
