Bugun Superliga 15-turi doirasida ikki o‘yin bo‘lib o‘tadi. Jizzax va Termizdagi bellashuvlar aslo zeriktirmaydi degan umiddamiz.
20:00. “So‘g‘diyona” – “Qo‘qon-1912”
Ikkala jamoa birinchi davrani kutilganidek o‘tkaza olmayaptilar. Ular turnir jadvalida mos ravishda 13 va 14-o‘rinda borishmoqda. Ayniqsa, qo‘qonliklar ketma-ket mag‘lubiyatlar seriyasiga tushib qolgan. Bu esa futbolchilarga ruhiy jihatdan ham ta’sir o‘tkazishi tabiiy.
“So‘g‘diyona” bugunning o‘zidayoq uchta yangi xaridlarni amalga oshirdi. Jaloliddinov, Rahmonov va Hebay endilikda jizzaxliklar safida to‘p suradi. Xullas, qiziqarli o‘yin bo‘ladi. Har holda ikkala jamoaga ham ochko suv va havodek zarur.
O‘yin oldidan mezbonlarda ustunlik bor. Ammo Bahrom Haydarov jamoasi ham ochko olish uchun oxirigacha kurashishiga shubha yo‘q.
20:00. “Surxon” – “Buxoro”
Har ikkala jamoada ham kayfiyat juda yaxshi. Fevzi Davletov jamoasi o‘tgan turda Olmaliqda OKMKga deyarli imkon qoldirmadi va 0:1 hisobida g‘alaba qozonib muhim uch ochkoni qo‘lga kiritdi.
“Buxoro” ham uzoq kutilgan g‘alabaga erishdi. Termizdan ham 3 ochko olib qaytishga bel bog‘lagan. Ammo “Surxon” yaxshi o‘yin ko‘rsatadigan bo‘lsa, Ulug‘bek Baqoyev va uning jamoasiga oson kechmasligi tabiiy.
Bu o‘yinda kichik ustunlik mezbonlar tomonida bo‘lishi mumkin. Ammo qolganini vaqt ko‘rsatadi.
