"Бавария"нинг ҳужумкор ярим ҳимоячиси Жамол Мусиала клублар ўртасидаги жаҳон чемпионатида "ПСЖ"га қарши ўйинда оғир жароҳат олди.
22 ёшли футболчи дарвозабон Жанлуижи Доннарумма билан тўқнашув натижасида кичик болдир суягини синдириб олган. Тахминларга кўра, мюнхенликлар ҳужумининг етакчиси тўрт ойдан беш ойгача сафдан чиқади.
Немис оммавий ахборот воситалари дарҳол "Бавария" фахрий Томас Мюллер билан Мусиала йўқлигида шошилинч равишда янги қисқа муддатли шартнома имзолаши мумкинлигини тахмин қилишди, аммо клубда миш-миш тасдиқланмади: "Бу ҳақда гап бўлмаган. Биз бундай нарса ҳақида ўйламаймиз," - деди "Бавария" спорт бўлими раҳбари Макс Эберль Sport1 нашрига берган интервьюсида.
"ПСЖ" билан шанба кунги ўйин Томас Мюллер учун "Бавария"дан кетиш олдидан охирги ўйин бўлди. 35 ёшли форвард клубни эркин агент сифатида тарк этмоқда.
