"Ювентус" ёзги трансферлар даврида янги вингерни ўз сафига қўшиб олади. Клуб ҳамон ижара муддати тугагач, "Порту"га қайтадиган Франсишку Консейсауни сотиб олиш фикридан қайтмаган, "кекса синьора" "Манчестер Юнайтед"дан Жейдон Санчога ҳам қизиқиш билдирмоқда. Журналист Жанлука ди Марционинг маълум қилишича, "Порту" билан музокараларда юзага келган келишмовчиликларга қарамай, "Ювентус" учун Консейсау устувор вариант бўлиб қолмоқда. "Аждарлар" 22 ёшли футболчи учун 30 млн евро талаб қилмоқда ва италиялик гранднинг босслари янги таклиф тайёрламоқда.
Санчога келсак, уни "Ювентус" "Б" режаси деб ҳисобламоқда, яқинда турли манбалар 25 ёшли инглиз трансфери бўйича "МЮ" билан деярли келишувга эришилгани ҳақида хабар тарқатганди.
