"Ювентус" "Барселона" марказий ҳимоячиси Рональд Араухо бўйича музокараларга киришишни режалаштирмаяпти.
Жорий ой ўртасига қадар уругвайлик футболчининг шартномасида 65 млн евролик товон пули бор. Журналистлар Маттео Моретто ва Фабрицио Романонинг хабар беришича, "Ювентус" миш-мишларга қарамай, Араухо номзодига қайтмоқчи эмас. Муҳокамалар олиб борилмаяпти, "кўк-анорранглилар" марказий ҳимоячиси "кекса синьора"нинг устувор мақсадлари қаторига киритилмаган.
Рональд Араухога январь ойидаёқ "Ювентус" қизиқиш билдирган, аммо ўшанда "Барселона" билан янги узоқ муддатли шартнома тузишни маъқул кўрганди. Июнь ойида ОАВда 26 ёшли футболчининг Туринга кўчиб ўтиши мумкинлиги ҳақидаги гап-сўзлар яна тарқалди.
