"ПСЖ" дарвозабони Жанлуижи Доннарумма клублар ўртасидаги жаҳон чемпионати 1/4 финалидан ўрин олган ўйинда (2:0) жароҳат олган "Бавария" ярим ҳимоячиси Жамол Мусиалага мурожаат қилганди.

Футболчилар ўйиннинг 45+4-дақиқасида тўқнашиб кетди. Мюнхенликлар ярим ҳимоячиси жиддий жароҳат олиб, учрашувни давом эттира олмади. Текширув натижаларига кўра, 22 ёшли немиснинг кичик болдир суяги синган ва тўпиғи чиққан. 7 июль куни Мусиала операция қилинди.

"Барча дуоларим ва эзгу тилакларим сен билан, Жамол Мусиала," - деб ёзди Доннарумма ижтимоий тармоқда.

"Барча тилакларингиз учун ташаккур ва хавотир олманг. Бу футболнинг бир қисми," - дея дарвозабонга жавоб қайтарди Мусиала.

"Бавария"да хабар қилинишича, Мусиала тез орада реабилитацияни бошлайди ва бир неча ой давомида жамоага ёрдам бера олмайди.