39 ёшли ярим ҳимоячи Лука Модрич ўз фаолиятини Италия футболида давом эттиради. Хорватиялик футболчи "Милан" билан меҳнат шартномасини имзолади. Инсайдер Фабрицио Романонинг хабар беришича, томонлар ўртасидаги шартнома бир йилга мўлжалланган.
Модрич Мадриднинг "Реал" клубини эркин агент сифатида тарк этди. У "қироллик клуби" сафида 2012 йилдан бери тўп тепиб келаётган эди. Лука учун сўнгги ўйин 2025 йилги клублар жаҳон чемпионатининг ярим финалида "ПСЖ"га қарши бўлди. "Реал" 0:4 ҳисобида йирик мағлубиятга учради ва мусобақадан чиқиб кетди.
Мадрид гранди таркибида Модрич тўрт марта Ла Лига чемпиони унвонини қўлга киритди ҳамда олтита Чемпионлар Лигаси совриндори бўлди.
