"Ливерпуль" ҳужумчиси Луис Диас жамоани тарк этишга тайёрлигини раҳбариятга очиқ айтди. Бу ҳақда журналист Флориан Плеттенберг хабар бермоқда.
Манбага кўра, агар қизиқарли таклиф тушса, "Ливерпуль" Диасни қўйиб юборади. Бироқ мерсисайдликлар аввалроқ футболчини “Бавария” ва “Барселона”га сотишдан бош тортган эди.
Журналистнинг сўзларига кўра, “Бавария” спорт директори Макс Эберль сўнгги кунларда “Ливерпуль” билан музокараларнинг янги босқичини ўтказган, бироқ ҳозирча томонлар ўртасида келишув йўқ.
Ўтган мавсумда 28 ёшли колумбиялик барча турнирлар доирасида 50та учрашувда иштирок этиб, 17та гол урди ва 8та голли узатмани амалга оширди.
