"Болонья" ўзининг истиқболли ҳужумчисини "Наполи"га сотишдан бош тортмоқда.
Журналист Николо Скиранинг хабар беришича, "қизил-кўклар" раҳбарияти шу ёзнинг ўзидаёқ Неаполь клубининг 24 ёшли Дан Ндойе бўйича икки таклифини рад этган. "Болонья" ўз ҳужумчиси учун камида 45 миллион евро олишни истаяпти, чунки футболчи сотувининг 15 фоизини Швейцариянинг "Базель" клуби олади.
"Наполи"нинг биринчи таклифи 30 миллион евро бўлган, иккинчиси эса ундан 5 миллион кўпроқ эди.
2024/25 йилги мавсумда Дан Ндойе "Болонья" сафида барча мусобақаларда 41 та ўйинда иштирок этиб, 9 та гол урди ва 6 та голли узатма берди.
Жамоа билан биргаликда у бу йил Италия кубогини қўлга киритди ҳамда финалда "Милан" дарвозасига ғалаба голини киритди.













