Мадриднинг "Реал" клуби ярим ҳимоячиси Дани Себальос жорий трансфер ойнасида сотилиши мумкин бўлган номзодлардан бири сифатида кўрилмоқда. Испаниялик футболчи клублар ўртасидаги жаҳон чемпионатида бор-йўғи 70 дақиқа майдонда бўлиб, бирор марта ҳам асосий таркибда майдонга тушмаган. Diario AS хабарига кўра, футболчи ёзда "қаймоқранглилар" яна бир хавбекни ўз сафига қўшиб олса, кетиш имкониятини жиддий кўриб чиқади. 28 ёшли футболчи 2026 йилги жаҳон чемпионатида Испания терма жамоаси қайдномасига кириш учун курашиш мақсадида мунтазам ўйин амалиётига эга бўлмоқчи.
Дани Себальоснинг "Реал" билан шартномаси 2027 йилгача мўлжалланган. Transfermarkt мутахассислари талқинига кўра, испаниялик футболчининг нархи 10 млн еврони ташкил этади.













