Финляндиянинг Ёенсуу шаҳрида енгил атлетика бўйича халқаро мусобақа бўлиб ўтди. Аҳамиятлиси, унда иштирок этган Ўзбекистон терма жамоаси аъзоси Анвар Анваров мамлакат рекордини янгилади ва олтин медалга сазовор бўлди.
Ҳамюртимиз сўнгги уринишда 8,25 метр натижа билан бир неча ҳафта муқаддам Тошкентда ўтган халқаро турнирда ўзи ўрнатган мамлакат рекордини (8,23 метр) яхшилади. Шубҳасиз, бу натижа Анваровга турнирда олтин медаль келтирди.
Қолаверса, мазкур мусобақанинг баландликка сакраш дастурида қатнашган Барно Сайфуллаева 1,85 метр билан уринишлар ҳисобига кўра бронза медалига сазовор бўлди.
Узунликка сакраш, эркаклар:
Анвар Анваров (Ўзбекистон) — 8,25 метр
Аниел Молина (Куба) — 7,86
Кристиан Пулли (Финляндия) — 7,82
Баландликка сакраш, аёллар:
Луизе Экман (Швеция) — 1,85 метр
Элла Миккола (Финляндия) — 1,85
Барно Сайфуллаева (Ўзбекистон) — 1,85
