Даниялик ҳужумчи Юссуф Поульсен "РБ Лейпциг"ни тарк этиб, "Гамбург"га ўтди, дея хабар бермоқда клуб матбуот хизмати. 31 ёшли ҳужумчининг меҳнат шартномаси 2027 йилнинг июнь ойи охиригача мўлжалланган.
Таъкидлаш керакки, тажрибали футболчи 2013 йилдан буён "буқалар" сафида тўп тепиб келаётган эди. Умумий ҳисобда Юссуф "Лейпциг" сафида 425 та ўйин ўтказиб, 95 та гол ва 66 та голли узатмани ўз ҳисобига ёздириб қўйган.
2024/2025 йилги мавсум якунларига кўра, "Гамбург" Германия чемпионати турнир жадвалида иккинчи ўринни эгаллади. Шу тариқа жамоа немис футболининг элитасига қайтди.
