Мадриднинг "Реал" клуби собиқ марказий ҳимоячиси Хесус Вальехо фаолиятини "Альбасете"да давом эттиради.
28 ёшли футболчи июнь ойи бошида "қироллик клуби" сафини эркин агент сифатида тарк этганди. Душанба куни футболчи билан шартнома имзолаганини Испаниянинг иккинчи кучли лигасида иштирок этувчи "Альбасете" эълон қилди. Маҳаллий мухлислар янги футболчини илиқ кутиб олишди: кўчада катта оломон тўпланиб, "қаймоқранглилар" собиқ марказий ҳимоячисининг исмини ҳайқиришди.
Хесус Вальехо ўн йил давомида "Реал"га тегишли бўлган, аммо бир неча бор бошқа клубларга ижарага кетган. Умуман олганда, испаниялик футболчи Мадрид грандининг асосий жамоаси сафида 35 та ўйинда майдонга тушиб, биттадан гол ва голли узатмани амалга оширган.
"Альбасете" Сегундада ўтган мавсум ўнинчи ўринни эгаллади.
