Ёзги трансфер ойнаси доирасида ОКМК футбол клуби таркибни кучайтириш йўлида дастлабки трансферини амалга оширганини маълум қилди.

Мудофа чизиғининг чап қанотида ўзининг ишончли ва интизомли ўйини билан ажралиб турувчи Иброҳим Йўлдошев мавсумнинг иккинчи даврасидан бошлаб «кончилар» сафида ҳаракат қилади. ОКМК ва футболчи ўртасида 1.5 йиллик шартнома имзоланди.

1.90 метр бўйга эга бўлган, 26 ёшли футболчи бунгача «Локомотив», «Металлург», «Сурхон», «Динамо» ва «Навбаҳор» клубларида тўп сурган. У профессионал фаолияти давомида Ўзбекистон Суперлигаси, Ўзбекистон Кубоги ҳамда Осиё Чемпионлар Лигаси доирасидаги ўйинларда жами 114 учрашувда майдонга тушган. Шунингдек, Иброҳим Йўлдошев ҳимоячи бўлишига қарамай, шу давр ичида рақиб дарвозасига 3 бор йўл топа олган ҳамда 5 та голли узатмага муаллифлик қилган.

"ОКМК ФК жамоаси ўзининг янги аъзосини мамнуният билан қабул қилади ва Иброҳим Йўлдошевга «кончилар» сафидаги фаолиятида улкан ютуқлар тилаб қолади", - дейилади клуб хабарида.