Кейинги мавсумда Чемпионлар лигасида иштирок этадиган Испаниянинг “Вильярреал” клуби Украина терма жамоаси ва Мадриднинг “Реал” клуби дарвозабони Андрей Лунин трансферига қизиқиш билдирмоқда. Бу ҳақда журналист Маттео Моретто Х ижтимоий тармоғида хабар берди.
Манбага кўра, "Реал Мадрид" дарвозабони "сув ости кемаси" томонидан асосий дарвозабон сифатида кўрилаётганига қарамай, футболчининг ўзи Мадридни тарк этишни истамаяпти. Шунингдек, “Вильярреал” дарвозабоннинг молиявий талабларини қондиришга тайёр эмаслиги такидланган.
Ўтган мавсумда Лунин барча турнирларда 14 та ўйин ўтказиб, 19 та гол ўтказиб юборган. Бундан ташқари, украиналик посбон олти марта “нолга” ўйнади. Transfermarkt порталига кўра, футболчининг тахминий нархи 18 миллион еврони ташкил қилади.
