"Арсенал" бош мураббийи Микель Артета "Челси"дан ҳужумчи Нони Мадуэкенинг трансфери ҳақида фикр билдирди.

18 июль, жума куни 23 ёшли британиялик футболчи Лондон клуби билан 4 йиллик шартнома имзолади. Sky Sports хабарига кўра, келишув суммаси 60 миллион евро ва бонуслар кўринишида 5 миллион еврони ташкил қилган.

"Нони - ажойиб ва кучли ёш футболчи, унинг сўнгги мавсумлардаги ўйинлари ва кўрсаткичлари доим юқори. У АПЛдаги энг иқтидорли қанот ҳужумчиларидан бири. У аллақачон клуб ва терма жамоада ўйнаш тажрибасига эга ва Премьер-лигани яхши билади. Биз Нони сўнгги мавсумларда қандай ўйнаганини кўрдик ва унинг сафимизга қўшилганидан жуда хурсандмиз," - дея Артетанинг сўзларини келтиради "Арсенал" матбуот хизмати.

Мутахассиснинг фикрича, Мадуэкенинг келиши жамоани кучайтиради.

Мадуэке 2023 йилнинг январидан буён "Челси"да ўйнаб келаётганди. У "кўклар" сафида 92 та ўйинда майдонга тушиб, 20 та гол урган ва 9 та голли узатмани амалга оширган. Англия терма жамоаси сафида 7 та ўйин ўтказган.