"Arsenal" bosh murabbiyi Mikel Arteta "Chelsi"dan hujumchi Noni Maduekening transferi haqida fikr bildirdi.
18 iyul, juma kuni 23 yoshli britaniyalik futbolchi London klubi bilan 4 yillik shartnoma imzoladi. Sky Sports xabariga ko‘ra, kelishuv summasi 60 million yevro va bonuslar ko‘rinishida 5 million yevroni tashkil qilgan.
"Noni - ajoyib va kuchli yosh futbolchi, uning so‘nggi mavsumlardagi o‘yinlari va ko‘rsatkichlari doim yuqori. U APLdagi eng iqtidorli qanot hujumchilaridan biri. U allaqachon klub va terma jamoada o‘ynash tajribasiga ega va Premyer-ligani yaxshi biladi. Biz Noni so‘nggi mavsumlarda qanday o‘ynaganini ko‘rdik va uning safimizga qo‘shilganidan juda xursandmiz," - deya Artetaning so‘zlarini keltiradi "Arsenal" matbuot xizmati.
Mutaxassisning fikricha, Maduekening kelishi jamoani kuchaytiradi.
Madueke 2023 yilning yanvaridan buyon "Chelsi"da o‘ynab kelayotgandi. U "ko‘klar" safida 92 ta o‘yinda maydonga tushib, 20 ta gol urgan va 9 ta golli uzatmani amalga oshirgan. Angliya terma jamoasi safida 7 ta o‘yin o‘tkazgan.
