"Брентфорд" ҳужумкор футболчиси Брайан Мбеумо 19 июль, шанба куни "Манчестер Юнайтед" сафига ўтишидан олдин тиббий кўрикдан ўтиши керак. Бу ҳақда таниқли журналист Фабрицио Романо хабар бермоқда.
Маълумотларга қараганда, 25 ёшли камерунлик футболчи манкунианликлар билан 2030 йилгача мўлжалланган шартнома имзолайди ва келишувда уни яна бир мавсумга узайтириш имконияти кўрсатилади. Аввалроқ битим суммаси қатъий белгиланган тўлов сифатида 75,4 млн еврога етиши, шунингдек, қўшимча етти миллион бонус тўловлари кўринишида тўланиши мумкинлиги маълум қилинганди.
2024/25 йилги мавсумда форвард "Брентфорд" сафида барча мусобақаларда 42 та ўйинда майдонга тушиб, 20 та гол урган ва тўққизта голли узатмани амалга оширган.
