"Барселона" вингер Нико Уильямсни ўз сафига қўшиб олиш устида ишлаётган эди, аммо яқинда футболчи "Атлетик" билан шартномасини ўн йилга узайтирди. AS нашри журналистлари футболчининг Каталония суперклубига трансфери барбод бўлишининг асл сабабини аниқлашга муваффақ бўлди.
Манбага кўра, "Барселона" спорт директори Деку ва Уильямснинг агенти Феликс Тейнта ўртасидаги музокаралар каталонияликлар агент "Атлетик" билан футболчининг яхшиланган шартномасини ҳам муҳокама қилаётганидан хабар топгунга қадар силлиқ кечган.
Музокараларнинг кечикиши "Барселона"нинг ҳафсаласини пир қилди ва клуб футболчи билан тўғридан-тўғри боғланди. Каталонияликлар Уильямсни агентидан воз кечишга ва Жорже Мендеш ёки Пини Захави кабилар билан ишлашни бошлашга ундашди. "Барселона"нинг бундай қадами Нико ва унинг оиласини ғазаблантирди. Якунда футболчи ўзи тарбия топган клубда қолишга қарор қилди.
