Мадриднинг "Реал" клуби ҳужумчи Гонсало Гарсияга таянишга тайёр.
21 ёшли футболчи ҳеч қандай ғайритабиий ҳодиса юз бермаса, "қироллик клуби"да қолади, дея хабар бермоқда Marca. Хаби Алонсо испаниялик футболчини асосий таркибда ўйнатишда давом этади.
Гонсало Гарсия ўтган клублар ўртасидаги жаҳон чемпионатида олтита ўйинда тўртта гол урди ва битта голли узатмани амалга оширди. Айнан "қаймоқранглилар" тарбияланувчисига турнирнинг "Олтин бутса"си насиб этди.
Бироз аввалроқ маълум бўлишича, "Реал" ҳужумчи билан янги шартнома бўйича музокаралар олиб бормоқда. Амалдаги шартнома муддати 2027 йил ўрталарида тугайди.
