23 ёшли франциялик ҳужумчи Юго Экитике тиббий кўрикнинг асосий қисмини якунлади ва шу тариқа Англиянинг "Ливерпуль" клубига ўтиш жараёнини якунлашга янада яқинлашди. Бу ҳақда журналист Фабрицио Романо ўз ижтимоий тармоқларида маълум қилди.
Манбага кўра, Германиянинг "Айнтрахт" клуби футболчиси билан 6 йиллик шартнома имзоланади. Аввалроқ келишув 79,7 миллион еврога тушиши, яна 11,5 миллион евро бонус сифатида олиниши мумкинлиги маълум бўлганди.
2024 йилдан буён франкфуртликлар шарафини ҳимоя қилиб келаётган Экитике ўтган мавсум клуб миқёсида 48 та ўйинда майдонга тушиб, 22 та гол урган ва 12 та голли узатмани амалга оширган.
