Миланнинг "Интер" клуби ўнг қанот ҳимоячиси Дензел Дюмфриснинг "Барселона"га ўтиши ҳақидаги миш-мишлар тобора авж олмоқда.
Бир қатор манбалар "кўк-анорранглилар"ни нидерландиялик футболчи учун асосий даъвогарлардан бири деб ҳисобламоқда, уни июль ойи охиригача 25 млн еврога харид қилиш мумкин. Diario AS нашрининг ёзишича, Каталония грандига Дюмфрис варианти чиндан ҳам ёқади, бироқ у асосий мақсад эмас. Амалдаги Испания чемпионларининг молиявий қийинчиликлари туфайли келишув амалга ошиши эҳтимоли жуда кам. Тахминларга кўра, 29 ёшли қанот ҳимоячисининг "Барса"га ўтиши клуб ундан олдин кимнидир сотиб юборган тақдирдагина амалга ошиши мумкин.
Дензел Дюмфриснинг Transfermarkt сайтидаги тахминий нархи - 35 млн евро. Футболчининг "Интер" билан шартномаси 2028 йилнинг ёзига қадар мўлжалланган.
