Мадриднинг “Атлетико” клуби словакиялик ҳимоячи Давид Ганцко билан шартнома имзолагани ҳақида расмий сайтида маълум қилди.
27 ёшли футболчи билан шартнома муддати беш йилга мўлжалланган. Ганцко аввалроқ “Фейеноорд”да ўйнаган.
Ганцко "Атлетико" тарихидаги словакиялик биринчи футболчи бўлди, у Мадриддаги базада асосий жамоанинг мавсумолди йиғинига қўшилади.
Олдинроқ словакиялик футболчи Саудия клуби базасида бўлган бўлса-да, Ганцконинг "Ан-Наср"га ўтиши амалга ошмай қолгани маълум бўлганди. "Ан-Наср" ва "Фейеноорд" келишувга эришди, унга кўра Давидга 35 миллион евро, яна 5 миллион евро бонуслар сифатида тўланиши керак эди. Словакиялик деярли шартнома имзолади, аммо саудияликлар сўнгги дақиқада келишувни якунлашдан бош тортди.
Ўтган мавсумда Ганцко барча мусобақаларда 47 та ўйин ўтказиб, 4 та гол урди ва 4 та голли узатмани амалга оширди.
