Франциянинг "Лилль" клуби "ПСЖ"га ўтиш арафасида турган дарвозабон Люка Шевальега ўринбосар қидирмоқда. Бу ҳақда маҳаллий L’Equipe нашри хабар бермоқда.
Манбага кўра, "Лилль" бир неча вариантни кўриб чиқмоқда. Асосий номзод НЕК вакили нидерландиялик Робин Руфс ҳисобланади. Англия клублари ҳам қизиқиш билдираётган 22 ёшли футболчи бўйича ҳозирча расмий таклиф бўлгани йўқ.
Руфс Нидерландия терма жамоаси сафида бир неча бор ёшлар ва турли ёшлар терма жамоаларида ўйнаган. Ўтган мавсумда футболчи клуб миқёсида 33 та ўйинда майдонга тушиб, 45 та гол ўтказиб юборган. Бозор нархи 4 миллион еврога баҳоланаётган дарвозабон 10 та ўйинда дарвозаси дахлсизлигини сақлаб қолди.
