Ўзбекистон U-20 ёшлар терма жамоаси Туркияда давом этаётган ёшлар ўртасидаги 2013 йилги жаҳон чемпионати гуруҳ босқичи доирасида Бурса ва Анталия шаҳарларида тўп сурган эди.

U-20 ЖЧ-2013 гуруҳ босқичидаги иштирокини якунлаган Ўзбекистон ёшлар терма жамоаси 30 июнь куни Тошкент вақти билан 12:00да Анталиядан Газиантепга шаҳрига парвоз қилди. «Borajet» авиакомпаниясининг ATR 72-500 самолётида ўтган парвоз бир соату 20 дақиқа давом этди.

Газиантеп шаҳри аэропортида Ўзбекистон U-20 ёшлар терма жамоаси делегациясини мусобақа ташкилотчилари кутиб олишди. Автобусда 30 дақиқалик йўл босиб ўтилгач, терма жамоа шаҳардаги энг нуфузли меҳмонхоналардан бири – «Dedeman»га жойлашди.

Қайд этиш жоиз, Газиантеп шаҳрида ҳаво ҳарорати Бурса ва Анталиядаги нисбатан бир қадар иссиқроқ; ҳозирги маълумотларга кўра, ҳаво ҳарорати кундузи 37 даражагача кўтарилмоқда. Ҳаво очиқ, ёғингарчилик аломатлари йўқ. Намлик даражаси эса Анталиядаги (55 фоиз) нисбатан анча паст ва Тошкентдагига (20 фоиз) анча яқин – 17 фоиз. Умуман, Газиантепнинг қуруқ ҳавоси Ўзбекистоннинг кескин континентал иқлимини эслатиб юборади.

Ўзбекистон ёшлар терма жамоаси куннинг иккинчи ярмида машғулотлар ўтказишни режалаштирган.

Эслатиб ўтамиз, Ўзбекистон ёшлар терма жамоаси «F» гуруҳида 4 очко тўплаб, гуруҳда учинчи ўринни эгаллагани ҳолда, муддатидан аввал нимчорак финал босқичи йўлланмасини қўлга киритган эди. Аҳмаджон Мусаев шогирдлари чорак финал йўлланмаси учун 2 июль, сешанба куни «D» гуруҳи ғолиби Греция ёшлар терма жамоасига қарши майдонга тушади.