Лондоннинг "Арсенал" клуби ҳужумкор ярим ҳимоячиси Фабиу Виейрага Англия Премьер-лигасининг бошқа бир клуби қизиқиш билдирмоқда.

"Канонирлар" 25 ёшли футболчига ишонч билдирмаяпти ва унга бўлажак харидорларнинг таклифларини эшитишга тайёр. Журналист Бен Жейкобснинг маълум қилишича, "Вест Хэм" Виейрани трансферлар рўйхатига киритган. "Болғачилар" португалиялик номзодини бошқалар қатори кўриб чиқмоқда, аммо ҳозирча расмий музокаралар олиб борилмаяпти.

Фабио Виейра ўтган мавсумни "Порту"да ижара асосида ўтказган эди. Хавбек "аждарлар" сафида 42 та ўйинда майдонга тушиб, бешта гол ва олтита голли узатмага муаллифлик қилди. Transfermarkt талқинига кўра, футболчининг нархи 22 млн еврони ташкил этади.