Леверкузеннинг "Байер" клуби дарвозабони Лукаш Градецки "Монако" билан музокара ўтказмоқда. Бу ҳақда Франциянинг L'Equipe нашри хабар бермоқда.
Манбага кўра, "Монако" раҳбарияти жамоанинг ҳозирги дарвозабонлари Филипп Кён ва Радослав Маецки клуб даражасига тўлиқ жавоб бермайди, деган хулосага келганидан сўнг, 1-рақамли дарвозабон бўлиш учун бир қатор номзодларни ўрганиб чиққан.
Жорже Петрович ва Марцин Булка охир-оқибат бошқа жамоалар билан шартнома имзолашни афзал кўришди, Давид Де Хеа эса "Фиорентина" билан шартномани узайтирди. Шундан сўнг "Монако" Градецки вариантига ўтди. Сўнгги маълумотларга кўра, битим якунланиш арафасида. Трансфер нархи 4 миллион еврони ташкил этиши мумкин.
