"Вест Хэм" футболчиси Лукас Пакета Англия футбол ассоциациясининг ставкалар бўйича қоидаларини бузган бўлиши мумкинлиги ҳақидаги иш бўйича расман оқланди.
Ишга қизиқиш 2022 йил ноябридан 2023 йил августигача бўлган даврда бразилиялик футболчи Премьер-лигада "Лестер", "Астон Вилла", "Лидс" ва "Борнмут"га қарши ўйинларда тўртта сариқ карточка олгани туфайли пайдо бўлди. Ўшанда футболчини умрбод дисквалификация қилиш масаласи муҳокама қилинганди.
"Вест Хэм"нинг хабар беришича, мустақил тартибга солувчи комиссия қоидабузарликлар йўқлигини тан олган ва барча даъволарни олиб ташлаган. Клуб раҳбариятининг таъкидлашича, узоқ давом этган суд жараёнида Пакета қўллаб-қувватланган.
