Якшанба куни мавсумолди тайёргарлик доирасида "Тоттенхэм" ва "Ньюкасл" Осиёда ўртоқлик учрашуви ўтказди. Жамоалар ғолибни аниқлай олмади - финал ҳуштагидан сўнг таблода 1:1 ҳисоби қайд этилди. Хён Мин Сон учун бу "Тоттенхэм"даги сўнгги ўйин эди. 65-дақиқада жанубий кореялик ҳужумчи алмаштирилганда, жамоа футболчилари ва мухлислар Сонни майдондан олқишлаб кузатишди.
"Хайрлашиш вақти келди. "Тоттенхэм" менинг қалбимда абадий қолади," - деди Сон ўйиндан кейин.
Сон Хён Мин "Тоттенхэм"да ўн мавсум ўтказди. Бу вақт ичида у жамоанинг 454 та ўйинида қатнашиб, 173 та гол урди ва шеригига 101 та голли узатмани амалга оширди.
