Бугун Греция ва Ўзбекистон ёшлар терма жамоалари ўртасидаги ЖЧнинг нимчорак финал баҳси олдидан матбуот анжумани ўтказилди. Унда дастлаб юнонлар бош мураббийи Костас Цанас иштирок этди.

"Ўзбекистонга қарши баҳсга тайёрмиз. Гуруҳдаги 3та ўйинда бўлгани каби бу учрашувда ҳам концентрацияни йўқотмаган ҳолда ўйнашимиз лозим. Бу ўйин биз учун муҳим аҳамиятга эга. Ғалаба қозонсак катта қадам ташлаган бўламиз. Бу грек футболи учун катта муваффақият бўлади. Биз рақиб номига аҳамият беришимиз керак эмас", дейди Костас.

Греция терма жамоаси гуруҳдаги 2та ўйинни айнан Газиантепда ўтказиб, яна ушбу шаҳарга қайтиб келди.

"Биз бу шаҳарда ўзимизни яхши ҳис қиляпмиз. Боиси Газиантепга 18 июнь куни ташриф буюргандик ва ўшанда бери ҳамон шу ердамиз. Биз бу ерда 2та ўйинни ўтказдик ва бу ўйинларда мағлубиятга учрамадик. Газиантепни ўзимизнинг уйимиз деб ҳисоблаймиз", дейди бош мураббий.

Ёш грек футболчилар жаҳон чемпионати якунланганидан кейин фаолиятларини кучли жамоаларда давом эттиришлари мумкин.

"Умид қиламанки, ушбу жамоадан айрим футболчилар кейинчалик жаҳон даражасидаги юқори футболчилар бўлиб етишади. Уларнинг орасида иқтидорли ва кучли характерга эга бўлган футболчилар бор", дея ишонч билан сўзлади Цанас.