Ўмон миллий футбол жамоасининг яқинда тайинланган бош мураббийи Карлуш Кейруш жамоа олдига аниқ мақсад қўйди – 2026 йилги Жаҳон чемпионатига йўлланмани қўлга киритиш. Сешанба куни Масқатда бўлиб ўтган танишув матбуот анжуманида португалиялик мутахассис ўз режалари ҳақида гапирди ва бу тарихий имкониятни амалга ошириш учун миллат якдиллигини талаб этди.

“Биз ўзимизни алдаб яшай олмаймиз. Агар ўзимизни алдасак, муваффақиятга эриша олмаймиз”, – деди Кейруш. – “Ростгўйлик жуда муҳим. Биз бу ерга зеҳн билан, ақл билан ишлаш ва муваффақиятга эришиш учун келганмиз”.

Июль ойида расман бош мураббий сифатида тайинланган Кейруш аввал ҳам олти турли мамлакат жамоасини Жаҳон чемпионатига олиб чиққан. Унга кўра, Ўмон билан бундай натижага эришиш бутун футбол жамоатчилигининг умумий саъй-ҳаракатларини талаб қилади.

“Ҳар бир инсон бу муҳим вазифа эканини тушуниши лозим – футболчилар, клублар, бошқарувчилар ва расмийлар – ҳаммамизнинг кучимиз бирлашиши керак”, – деди у. – “Бундай имконият Ўмон тарихида ҳали бўлмаган. Биз бу орзуни рўёбга чиқариш учун ундан фойдаланишимиз керак”.

71 ёшли мураббий аллақачон жамоа ва футболчиларни таҳлил қилиш ишларини бошлаб юборди. Ўмон терма жамоаси Ўзбекистонда бўлиб ўтадиган Марказий Осиё чемпионати олдидан Туркияда йиғин ўтказиши режалаштирилган.

“Ўмонда беш миллиондан ортиқ аҳоли бор, лекин юрак фақат битта уриши керак”, – деди Кейруш. – “Бу орзу – бизнинг вазифамиз. Унга интизом ва тўғри хулқ орқали эришишимиз мумкин”.

“Реал Мадрид”нинг собиқ мураббийи жорий йил октябрь ойида Жаҳон чемпионатига чиқиш бўйича йўл харитаси эълон қилиниши ҳақида маълум қилди.

“Ҳозирги асосий вазифа – бутун энергия ва имкониятларни Жаҳон чемпионатига чиқишга сафарбар қилиш”, – деди у. – “Октябрдан сўнг Ўмон футболи ривожланиши бўйича аниқ режа тақдим этамиз”.