Суперлига 17-туридан ўрин олган "Машъал" — "Динамо" (2:4) учрашувидан сўнг "Машъал" бош мураббийи Отабек Нарзуллаев матбуот анжуманида иштирок этди.

— Дастлаб ўйин ҳақида фикрингиз?

— Учрашувни яхши бошладик, 2:0 ҳисобида олдинга чиқиб олдик, кейин эса юзага келган хатолар ўзимизга қимматга тушди. Бугун айниқса ҳимояда кўп хато қилдик. Биринчи таймдаги ғалабани ушлаб қолмаганимиз чатоқ бўлди. Футболчилар билан психология томонлама ишлашга тўғри келяпти. Жамоамизда потенциал яхши, фақат футболчилар ўз кучига ишонмаяпти. Кўп эмас озгина ишонч бўлса, ғалабалар албатта келади деб ўйлайман.

— Бугун асосий хато нимада бўлди?

— Биз ғалабага эртага ишониб юбордик ва ўйиннинг қолган қисмини 2:0ни ушлаб қолишга ўтказишга ҳаракат қилдик. Ўйин бошида урилган гол — бу ҳали ғалаба дегани эмас. Кўпроқ ҳужумга ўтишимиз керак эди. Ҳимояга эрта ётганимиз салбий таъсир қилди. Аввалги тур "Пахтакор" билан ҳам эрта ҳимояга ўтиб олгандик. Жароҳатдан чиққан футболчиларни ҳам майдонга туширяпмиз, лекин уларнинг жисмоний ҳолати тўлиқ тайёр эмас. Лекин шунга мажбур бўляпмиз.

— Бугунги ўйинда иккита гол урган Беҳрузбек Облоқулов "Машъал" академияси тарбияланувчиси. Ўз вақтида қўл остингизда "Машъал" U-19 жамоасида ўйнаган.

— Энди бу футбол. Бу ўринда бизни хурсанд қилиши мумкин бўлган ягона жиҳат — Облоқуловнинг "Машъал" академиясидан чиққанлиги. Лекин кейинчалик ким қаерда бўлишидан қатъий назар, футболчи ўз ишини қилади, мураббий ўз ишини қилади. Футболчининг иши майдонга чиқиб жамоаси учун борини бериш. Мен натижадан хафаман, лекин Беҳруз учун хурсандман. Бу бола қанча ўсса янаям хурсанд бўламан. Биз эса ўйинни таҳлил қиламиз ва камчиликларни ўрганамиз. Бугун ютқаздикми демак, мен айбдорман ва айбимни ўз бўйнимга оламан.

— Ҳумоюн Муртазоев қачон сафга қайтади?

— Насиб қилса, кейинги ўйинларга қайтиши керак. Хумоюн йўқлиги биз учун катта йўқотиш. Шифокорлар қачон рухсат берса, шундан сўнг машғулотга қайтади. Кейинги турни "Сўғдиёна"га қарши ўтказамиз. Насиб қилса бу ўйинга ҳам жиддий тайёргарлик кўриб, Жиззахдан яхши кайфият билан қайтишга ҳаракат қиламиз.