Лондоннинг "Челси" клуби ҳужумчиси Николас Жексон катта эҳтимол билан клубни тарк этади. Бу ҳақда инсайдер Фабрицио Романо хабар бермоқда.
Манбага кўра, жорий трансферлар даврида Жексон "Челси"ни тарк этиши кутилмоқда. Жамоа бош мураббийи Энцо Мареска ҳужумчи билан хайрлашиши мумкинлиги ҳақидаги маълумотни инкор этмади.
"Трансфер ойнаси вақтида ҳамма нарса бўлиши мумкин. Бу Николас Жексонга ҳам тааллуқли. Иккита ҳужумчи билан шартнома имзоладик, кўрамиз," - деди Мареска.
Ўтган мавсумда 24 ёшли сенегаллик футболчи 37 та учрашувда 13 та гол урди ва 6 та голли узатмани ўз ҳисобига ёздириб қўйди.
Transfermarkt портали мутахассислари Жексоннинг нархини 50 миллион еврога баҳоламоқда.
