Мадриднинг "Реал" клуби чап қанот ҳимоячиси Альваро Каррерас жамоадаги илк ўйинидан кейин ўз фикрларини билдирди.
Испаниялик футболчининг норасмий дебюти Австриянинг "Тирол" клубига қарши ўртоқлик учрашувида бўлиб ўтди ва "қаймоқранглилар"нинг 4:0 ҳисобидаги ғалабаси билан якунланди. Янги ўйинчи асосий таркибда майдонга тушиб, 63 дақиқа ҳаракат қилди.
"Реал" либосини кийиш мен учун катта шараф. Жамоада мени зўр қабул қилишди, ҳеч қандай муаммо йўқ, мавсумга астойдил тайёргарлик кўришда давом этишим керак. Ўртоқлик учрашуви бўладими ёки йўқми - фарқи йўқ, биз учун муҳим ўйин бўлди. Ҳар доим ғалаба ва ривожланишга интилиш керак. Мураббийнинг талабларига мослашяпман. Биз қандай ўйнашимиз кераклиги ҳақида аниқ тасаввурга эгамиз, лекин асосийси - ғалаба қозониш," - деди Каррерас интервьюда.
Эслатиб ўтамиз, "Реал" июль ойида "Бенфика"дан латерални 50 млн еврога сотиб олган эди.
