"Рома" "Интер" қизиқиш билдираётган ярим ҳимоячи Куадио Коненинг ўрнига кимни олиб келишини аниқлаб олди. Инсайдер Фабрицио Романонинг Х ижтимоий тармоғида ёзишича, римликлар "Монако"дан 21 ёшли Сунгут Магасса ҳақида маълумот сўраган.
Манбага кўра, Магасса номзодини "Рома" спорт директори Фредерик Массара илгари сурмоқда. Франция ёшлар терма жамоаси ҳимоячисининг "Рома"га ўтиши, агар "Интер" Коненинг трансферини ёпса, амалга ошиши мумкин. Аввалроқ, миланликлар хавбек учун "бўрилар"га 50 млн евро беришга тайёрлиги ҳақида хабарлар тарқалган эди.
"Монако" эса "Ноттингем Форест"нинг Магасса бўйича таклифини рад этди. Инглизлар трансфер учун 13 млн евро тўлашга тайёр эди. Transfermarkt портали "Монако" тарбияланувчисини 12 млн еврога баҳоламоқда.













