"Барселона" "Мальорка"га қарши ўйиннинг 1-бўлимида икки киши кўп бўлиб қолди.
Жамоалар Испания чемпионатининг 1-турида тўқнаш келишмоқда, иккинчи бўлим бошланди, ҳисоб "кўк-анорранглилар" фойдасига 2:0.
Учрашувнинг 33-дақиқасидаёқ мезбонлар бир киши кам бўлиб қолишди, ярим ҳимоячи Мануэль Морланес Ламин Ямалга нисбатан ишлатган қўполлиги учун иккинчи сариқ карточкани олди. Илк сариқ карточкасини у 24-дақиқада ҳакам билан баҳслашгани учун олганди.
36-дақиқада ҳужумчи Ведат Мурики жарима майдони чизиғи устида "Барселона" дарвозабони Жоан Гарсиянинг боши ёки бўйнига бутсасининг таги билан зарба берди. Аввалига ҳакам Косово терма жамоаси футболчисини огоҳлантирди, аммо такрорий вазиятни ўрганиб чиққач, уни майдондан четлатишга қарор қилди.
Шу тариқа, "Мальорка" биринчи бўлимни тўққиз киши бўлиб якунлади.
