ФИФА клублар ўртасидаги жаҳон чемпионатини кенгайтириш имкониятини кўриб чиқади.
The Guardian хабарига кўра, Халқаро футбол федерацияси 2029 йилдан бошлаб ҳар икки йилда бир марта турнир ўтказиш ғоясини баҳолайди. Турнирлар оралиғидаги вақтни қисқартиришни "Реал" таклиф қилганди, бу йилги мавсумни ўтказиб юборган бир қатор клублар, жумладан, "Ливерпуль", "Барселона", "Наполи" ва "Манчестер Юнайтед" мадридликларнинг ташаббусини қўллаб-қувватлади.
Шунингдек, иштирокчилар сонини кўпайтириш (32 тадан 48 тагача) ва "бир мамлакатдан кўпи билан иккита клуб" қоидасидан воз кечиш имконияти кўриб чиқилмоқда.
ФИФА тўлиқ тақвим билан боғлиқ танқидлар фонида терма жамоаларнинг июнь ойидаги ўйинларидан воз кечиш масаласини кўриб чиқиши мумкин, аммо бу ёз бошида Миллатлар лигаси финал босқичини ўтказадиган УЕФАнинг қаршилигига сабаб бўлиши мумкин.
