Мадриднинг "Реал" клуби Испания чемпионатининг навбатдаги мавсумини ўз майдонида "Осасуна"га қарши баҳс билан бошлайди. Учрашув сешанба куни бўлиб ўтади, унинг бошланиши Тошкент вақти билан 00:00 га белгиланган.
Diario AS тахминига кўра, "қаймоқранглилар" 4-3-3 схемасида ҳаракат қилади, ҳужум учлиги Браим Диас, Килиан Мбаппе ва Винисиус Жуниордан иборат бўлади. Ярим ҳимояда Федерико Вальверде, Орельен Тчуамени ва Арда Гюлер, ҳимояда Трент Александр-Арнольд, Эдер Милитао, Дин Хёйсен ва Альваро Каррерас, дарвозада Тибо Куртуа ўйнайди.
Эслатиб ўтамиз, "Реал" клублар ўртасидаги жаҳон чемпионатидаги иштироки туфайли ўйинни қолдиришни талаб қилган, аммо Ла Лига бунга рад жавобини берган эди. Ушбу тўқнашув Хаби Алонсо учун жамоа бош мураббийи сифатида чемпионат доирасидаги илк ўйин бўлади.
