Лондоннинг «Челси» футбол клуби эгалари алмашганидан кейин янги ва анча кенгайтирилган скаутлик стратегиясини амалга оширишга киришди. Бу сафар клуб анъанавий марказий бозорлардан ташқаридаги ҳудудларга эътибор қаратмоқда. Хусусан, Марказий Осиё давлатлари, жумладан Ўзбекистонга алоҳида урғу берилмоқда. Бу эса минтақа ёш истеъдодлари учун беқиёс имкониятларни очиб бериши мумкин.

Янги раҳбарият келиши билан клубнинг трансфер сиёсати жиддий ўзгарди. Энди «Челси» тайёр юлдузлардан кўра ёш ва истиқболли футболчиларни топиш ҳамда ривожлантиришга катта аҳамият бермоқда. Шу мақсадда клуб скаутлари Марказий Осиёда тизимли равишда иш бошлади. Қидирув географияси эндиликда Қозоғистон, Ўзбекистон, Қирғизистон, Туркманистон ва Тожикистонни қамраб олмоқда — бу ҳудудлар илгари етакчи Европа клублари диққат марказига деярли тушмаган эди.

Скаутлар фаолияти максимал махфийлик билан олиб борилмоқда. «Челси» мутахассислари минглаб ёш футболчиларни очиқ ошкор қилмасдан ўрганишмоқда. Бундай ёндашув орқали ёш иқтидорлар нархининг сунъий равишда кўтарилишига йўл қўйилмайди. Улар ёшлар турнирлари, маҳаллий лигалар ўйинлари ва ҳатто машғулотларда ҳам кузатув олиб боришмоқда.

Янги стратегия самараси аллақачон ўзини кўрсатди. Хусусан, шу скаутлар фаолияти натижасида қозоғистонлик ҳужумчи Дастан Сатпаев билан «Челси» шартнома тузди. У келаси йил Лондон клубига қўшилади. Бу трансфер бутун Марказий Осиё футболи учун муҳим воқеа сифатида баҳоланмоқда.

Ўзбекистон ёш футболчилари учун эса бу катта сигнал — уларнинг ўйини, техникаси ва ўсиши етук мутахассислар назаридан четда қолмаяпти. Жаҳон футболидаги етакчи клублардан бири кузатув олиб бораётгани, улар учун «катта футболга» йўл ҳар қачонгидан ҳам яқин эканини англатади.

Айни вақтда Ўзбекистон ўз тарихидаги энг кучли авлод футболчиларини бермоқда. Бунинг ёрқин намунаси сифатида Ҳусановнинг бошқа бир европа гранди — «Манчестер Сити»га ўтганини мисол қилиш мумкин. Бу эса яна бир бор жаҳон футболи бизнинг мамлакатга жиддий қизиқиш билан қараётганини кўрсатиб турибди.