ФИФА Туркияда давом этаётган ёшлар ўртасидаги 2013 йилги жаҳон чемпионати чорак финал учрашувларини бошқариб борувчи ҳакамлар рўйхатини эълон қилди.

Ўзбекистон U-20 ёшлар терма жамоаси 6 июль, шанба куни Ризе шаҳридаги “Йэни Шеҳир” стадионида U-20 ЖЧ-2013 чорак финал босқичи доирасида Франция ёшлар терма жамоасига қарши майдонга тушади. Учрашувни бразилиялик Сандро Рикки бошчилигидаги ҳакамлар бригадаси бошқариб боради.

Бразилиялик бош ҳакамга қанотларда ватандошлари – Алессандро Роха ва Эмерсон де Карвалью ёрдам беради. Эквадорлик Карлос Вера тўртинчи ҳакам, унинг ватандоши Кристиан Лескано эса захира қанот ҳаками сифатида қайд этилган.

Сандро Рикки бошчилигидаги ҳакамлар бригадаси бунгача ЖЧ-2013 гуруҳ босқичи доирасида 22 июнь куни Туркия – Сальвадор (3:0) ва 29 июнь куни Хорватия – Янги Зеландия (2:1) ўйинларини назорат қилган эди. Дастлабки ўйинда Рикки жами уч марта, иккинчи ўйинда эса икки марта футболчиларга сариқ карточка кўрсатган.

38 ёшли Сандро Рикки халқаро ҳакамлик фаолиятини 2011 йилда бошлаган бўлиб, ЖЧ-2014 саралаш босқичи ўйинларида ҳакамлик қилган. Бундан ташқари, ФИФА уни 2014 йили Бразилияда бўлиб ўтадиган футбол бўйича жаҳон чемпионатида ишлаши мумкин бўлган ҳакамларнинг кенгайтирилган рўйхатига киритган. Сандро Рикки 2010 йили Бразилия чемпионатининг энг яхши ҳаками деб тан олинган.

Қайд этиш жоиз, бунгача ҳам Ўзбекистон ёшлар терма жамоаси иштирокидаги ўйинларни парагвайлик, перулик, венгриялик ва ивуарлик ҳакамлар бошқариб боришган эди.