Испаниялик ҳимоячи Лукас Васкес Леверкузеннинг "Байер" клуби футболчисига айланди. Бу ҳақда немис клуби матбуот хизмати ўз сайтида расман маълум қилди.
"Реал"нинг собиқ ҳимоячиси "доришунослар" билан икки йиллик шартнома имзолади. Бундеслигада у 21-рақам остида ўйнайди.
Эслатиб ўтамиз, Васкес шу йил ёзда шартнома муддати тугаганидан кейин "қаймоқранглилар" лагерини тарк этганди. У 2007 йилдан буён жамоа тизимида эди. Мадрид клубида 34 ёшли футболчи тўрт марта Испания чемпиони бўлган ва беш марта Чемпионлар Лигаси кубоги соҳибига айланган. Васкес 30 август куни "Байер" сафида дебют қилиши мумкин. Бундеслиганинг 2-турида леверкузенликлар "Вердер"га қарши баҳс олиб боради.
