Ўзбекистон миллий терма жамоаси бош мураббийи Тимур Кападзе йиғин ва олдиндаги мусобақа ҳақида фикр билдирди.

"Бугун биринчи кун йиғинга киришдик. Олдимизда CAFA мусобақаси кутиб турибди. Тайёргарликни бугундан бошладик. Аммо барча футболчилар ҳали сафимизга келиб қўшилмади. Айрим ўйинчилар эртага келиб қўшилишади. Легионерларимизнинг баъзилари 28 август куни етиб келса, баъзилари кечроқ келади. Шунинг учун ихтиёримиздаги бор ўйинчилар билан йиғинни бошладик. 30 август куни ўтказиладиган илк ўйинимизга тайёргарлик кўрамиз.

Жамоада ҳар бир футболчининг ўз ўрни бор. Жалолиддин Машарипов эса жамоамизни кучайдиган ўйинчи ҳисобланади. Аммо футболда жароҳатлар учраб туради. Тезроқ тузалиб, сафга қайтади, деб ўйлайман.

Ўмонга қарши ўйин қийин бўлади. Жамоага янги бош мураббий келган. Карлос Кейруш яхши даражадаги мураббий ҳисобланади. Адашмасам, улар 6-7 кундан буён Туркияда йиғин ўтказяпти. Боз устига, илк ўйинда бизга легионерларимиз ёрдам бера олишмайди. Бошқа футболчиларга таянган ҳолда ўйнаймиз. Уларни синовдан ўтказиб олиш учун Ўмон яхши спарринг-рақиб деб ўйлайман. Ҳар бир ўйинга яхши тайёргарлик кўриб, ғалаба учун ҳаракат қиламиз ҳамда футболчиларни кўздан кечириб оламиз", — деди Кападзе.