"Пари Сен-Жермен" клуби ҳужумкор ярим ҳимоячиси Марко Асенсио тез орада Англияга қайтиши мумкин.
Парижликлар испаниялик футболчининг трансфери бўйича "Астон Вилла" билан келишувга эришишга яқин турибди, дея хабар бермоқда журналист Лоик Танзи. "Вилла" 29 ёшли футболчи учун 15 млн евро таклиф қилишди ва "ПСЖ" 20 млн евро сўраган бўлса-да, бунга рози бўлиш арафасида. Иккала клуб ҳам оптимистик кайфиятда ва тез орада келишув якунланишига ишонмоқда.
Марко Асенсио ўтган мавсумнинг иккинчи қисмида ижара асосида "Астон Вилла" шарафини ҳимоя қилган эди. Футболчи Унаи Эмери жамоаси сафида 21 та ўйинда 8 та гол урган ва битта голли узатмани амалга оширган.
