Мадриднинг "Реал" клуби Ла Лига 3-туридан ўрин олган "Мальорка"га қарши баҳс олиб борди. Шанба кунги учрашув ўз майдонида мадридликларнинг иродали ғалабаси билан якунланди - 2:1. Учрашувнинг 7-дақиқасида Ведат Мурики томонидан киритилган голга "қаймоқранглилар" 37 ва 38-дақиқаларда Арда Гюлер ҳамда Винисиус Жуниорнинг аниқ зарбалари билан жавоб қайтарди.
Учрашувнинг энг яхши футболчиси сифатида мезбонларнинг биринчи голи муаллифи Гюлер эътироф этилди. Туркиялик ярим ҳимоячи 55-дақиқада иккинчи голни урди, бироқ ВАР турк хавбеки қўл билан ўйнагани учун голни бекор қилди. 72-дақиқада Хаби Алонсо 20 ёшли футболчини алмаштирди.
"Реал" ҳисобида Испания чемпионатининг 3 туридан кейин тўпланган 9 очко бор.
