Европа топ-лигаларида ёзги трансфер ойнаси ёпилишига бир суткадан сал кўпроқ вақт қолди. Daily Mail саҳифаларида ёзнинг сўнгги кунида Кобби Майнунинг келажаги ҳақида материал эълон қилинди. Унда айтилишича, "Манчестер Юнайтед"нинг 20 ёшли футболчиси ҳамон ижарага кетишни истамоқда. Майну Англия терма жамоаси сафида жаҳон чемпионатида иштирок этиш имкониятига эга бўлишни истайди, шунинг учун у Бруну Фернандешга ўринбосар ролидан мамнун эмас.
Шу билан бирга, таъкидланишича, вазият Матеус Кунья ва Мэйсон Маунтнинг жароҳат олиши ортидан ўзгариши мумкин. "Бёрнли"га қарши ўйинда футболчилар майдонни тарк этганида, Бруну Фернандеш ҳужумга яқинроқ жойлаша бошлади, Майну эса майдон марказида ҳаракат қилди. Умуман олганда, яқин орада Кобби кўпроқ ўйин амалиётига эга бўлиши мумкин. Бу факт унинг келажагига таъсир қилиши мумкин.
