УЕФА президенти Александер Чеферин Исроил жамоаларининг халқаро турнирларда иштирок этиш ҳуқуқидан маҳрум қилинишига қарши чиқди. Бундан ташқари, ташкилот раҳбари Украинадаги ҳарбий ҳаракатлар туфайли Россияга нисбатан киритилган чекловлар иш бермаётганини тан олди.
"Спортчи ўз ҳукуматига ҳарбий ҳаракатларни тўхтатиш учун нима дейиши мумкин? Ҳозир россиялик спортчилар, менинг ҳисоб-китобларим бўйича, уч ярим йилга дисквалификация қилинди. Украинадаги ҳаракатлар тўхтадими? Йўқ", - деди Чеферин Politico билан суҳбатда.
Исроил қўшинлари томонидан Ғазода тинч аҳолини навбатдаги ўққа тутиш чоғида собиқ фаластинлик футболчи ҳалок бўлгач, кўпчилик Россиядан ўрнак олиб, Исроилни дисквалификация қилишни талаб қила бошлади. Айни пайтда РФИ спорт сиёсатдан ташқарида қолиши ва Исроилга қарши санкциялар қўллаш ўрнига Россиядан олиб ташланиши кераклигини айтди.
