Татаристон пойхтати Қозон шаҳрида давом этаётган бутунжаҳон универсиада мусобақаларида иштирок этаётган боксчиларимиз муваффақиятли натижаларини давом эттиришмоқда.
Бугун куннинг биринчи ярмида чорак финал учрашувларида рингга чиққан учта спортчимизнинг барча ярим финал йўлланмасини қўлга киритди. Терма жамоамизнинг мусобақадаги йўқотишсиз бораётган сериясини давом эттиришди.
52кг.гача вазнда рингга кўтарилаётган ҳамюртимиз Жасурбек Латипов чорак финалда сўнгги пайтларда кескин кўтарилишга эришган Украина боксчисини мағлуб этди. Украина шарафини ҳимоя қилган Александр Шепелюкка Жасур уччала раундда ҳам ҳеч қандай имконият қолдирмади. Энди у ярим финалда тожикистонлик рақибини мағлуб этган мўғулистонлик Энхделгер Харкхууга қарши рингга чиқади.
60кг. вазн тоифасида рингга чиқаётган Фазлиддин Ғойибназаров эса чорак финалда туркманистонлик Фаррух Ёмудов билан баҳс олиб борди ва рақибни уч раундда ҳам мағлуб этиб ярим финалда иштирок этиш ҳуқуқини қўлга киритди. Ярим финалда Ғойибназаров мўғулистонлик Отгондалай Дорйнямбуга қарши рингга чиқади. Отгондалай чорак финалда украиналик Дмитро Руденкони мағлубиятга учратганди.
69кг вазн тоифасида иштирок этаётган яна бир боксчимиз Хуршидбек Норматов эса чорак финалда франциялик Сулаймон Сиссохо устидан икки раунддаги устунлик эвазига ғалаба қозонди. Учинчи ярим финалчимиз ҳам бу босқичда мўғулистонлик спортчи билан рингга чиқадиган бўлди. Хуршидбекнинг бўлажак рақиби Тувшинбат Бямба чорак финалда ҳиндистонлик Назирий Пиракийдан устун келган.