Футзал бўйича Ўзбекистон миллий терма жамоаси аъзолари бугундан навбатдаги ўқув-машғулот йиғинига киришади. Терма жамоага чақирилган ўйинчилар пойтахтимиздаги “Велара” меҳмонхонасида истиқомат қилишади. Машғулотлар эса “Юнусобод” спорт мажмуасида ўтказилади.
Мазкур йиғин 20–24 сентябр кунлари Бишкек шаҳрида бўлиб ўтадиган Осиё Кубоги – 2026 саралаш мусобақаси олдидан сўнгги кўрик вазифасини ўтаб беради.
Йиғин давомида Осиё қитъаси грандларидан бири – Япония терма жамоаси билан назорат учрашувида куч синашиш ҳам режалаштирилган. Кунчиқар мамлакат термасига қарши ўртоқлик ўйини 16 сентябр куни соат 17:00 да “Юнусобод” спорт мажмуасида бўлиб ўтади.
Эслатиб ўтамиз, Ўзбекистон миллий терма жамоаси 18 сентябр куни Бишкекка учиб кетади. Қирғизистон Республикаси пойтахтида бўлиб ўтадиган Осиё Кубогининг F саралаш гуруҳида терма жамоамиз мезбонлардан ташқари Шарқий Тимор ҳамда Фаластин терма жамоаларига қарши майдонга чиқишади.
Мураббийлар штаби бугун бошланадиган йиғинга қуйидаги футзалчиларни жалб этган:
Дарвозабонлар – Аббос Ўлмасбеков ("BMB PFC"), Шавкат Ибрагимов (“Oil Star”), Дониёр Умаров (“Локомотив”).
Ҳимоячилар – Илҳомжон Ҳамроев (“Oil Star”), Машраб Одилов ("BMB PFC"), Шаҳзод Саъдиев ("BMB PFC").
Қанот ўйинчилари – Беҳруз Самиев (“Oil Star”), Ҳусниддин Нишонов ("BMB PFC"), Элдор Ниғматов (“Локомотив”), Муҳаммадали Хусанов ("BMB PFC").
Қанот ҳужумчилари – Элбек Тўлқинов (“Oil Star”), Аббор Аҳмедзянов (ОКМК), Музаффар Абдукаримов (ОКМК), Акбар Усмонов (СҚБ).
Ҳужумчилар – Музаффар Аҳаджонов ("BMB PFC"), Давлат Ибрагимов ("BMB PFC").
