Португалия терма жамоаси ҳужумчиси Криштиану Роналдунинг турмуш ўртоғи Жоржина Родригес футболчининг қизи отаси учун ёзиб қолдирган аудиони ошкор қилди. Ёзув ЖЧ-2026 саралашининг Арманистонга қарши биринчи тур ўйинидан олдин тайёрланган. Роберто Мартинес шогирдлари рақибни 5:0 ҳисобида мағлуб этди, 40 ёшли форвард эса дубль қайд этди.

«Агар сен кетиб қолсанг, мен сени соғинаман. Мен сени севаман», — дейилади ёзувда. Бу аудиони As нашри эълон қилди.

Овозга қараганда, ёзув Роналдунинг энг кичик қизи — Белла Эмералда томонидан юборилган. У апрель ойида 3 ёшга тўлди. Шунингдек, Криштиану ва Жоржинада 7 ёшли қизи Алана Мартина ҳам бор. Форварднинг суррогат онадан туғилган 8 ёшли қизи Ева ҳам мавжуд.