Франция терма жамоасининг бош мураббийи Дидье Дешам "Рома" ярим ҳимоячиси Ману Коненинг миллий жамоада кўрсатаётган ўйини ҳақида фикр билдирди.

"У "Рома"да жуда яхши мавсумни ўтказмоқда ва ҳар бир машғулотдан сўнг биз учун янада муҳимроқ бўлиб бормоқда. У тўпни олиб қўйишда жуда самарали", - деди мутахассис матбуот анжуманида.

Ўтган мавсумда Коне Рим клуби сафида 45 та ўйин ўтказиб, 2 та гол урди ва 3 та голли узатма берди.

Сентябрь ойидаги халқаро танаффусда французлар жаҳон чемпионати саралаш босқичида иккита ўйин ўтказди. Дешам жамоаси Украина (2:0) ва Исландия (2:1) терма жамоаларини мағлуб этишга эришди.